Ylli i repartit sulmues të Liverpool-it mund të vijë sërish nga futbolli egjiptian.
Me Mohamed Salah gati për t’i thënë lamtumirë “Anfield”-it, duket i ndikuar edhe nga lamtumira e Jurgen Klopp në fund të sezonit, drejtuesit e klubit anglez kanë filluar të kërkojnë një sulmues të ri përpara sezonit 2024-2025.
Ky hulumtim e ka çuar klubin e Merseyside në gjurmët e Omar Marmoush, sulmuesit egjiptian të Eintracht Frankfurt dhe kombëtares së Afrikës së Veriut, ku tashmë ndan dhomën e zhveshjes me “Faraonin”.
Sipas asaj që raporton BILD, në fakt, drejtuesit e Liverpool-it po përgatisin në këtë drejtim një ofertë afër 60 milionë euro për sulmuesin e lindur më 1999. Marmoush ka bërë 33 paraqitje dhe ka shënuar 15 gola për klubin gjerman gjatë sezonit aktual, ndërsa më parë kishte veshur edhe ngjyrat e Wolfsburgut, St.Pauli dhe Shtutgart.
